Anboto 2024ko abu. 22a, 11:14
Urte askoan Durangako Azokaren zuzendaria izan zen. Durangaldeko historiaren inguruan ikerketa ugari egin zituen.
Jon Irazabal Agirre (Iurreta, 1960) historialaria hil da. Iurretarra Gerediaga elkarteko kudeatzailea izan zen, eta baita Durangoko Azokako zuzendaria ere. Azken urteetan jubilatuta egon arren, ez zion Durangoko historiaren inguruan ikertzeari utzi. Durangoko bonbardaketaren inguruan ikertzen hasi zen lehenengoetarikoa izan zen. Durangaldeko dantzen inguruan ere aditua zen. ANBOTOko kolaboratzailea izan zen, bai zutabegile moduan eta baita gai askotan aditu moduan ere.
Ikerlari nekaezina
Durangoko bonbardaketaren inguruan ezer gutxi ezagutzen zen sasoian Irazabalek gertaera latz hura ahanzturatik atera zuen. Gai horren inguruan hainbat lan kaleratu zituen. Erretiroa hartu ostean ere, artxiboetan arakatzen jarraitu zuen.
2019an Martxoaren 31ri buruz bere azken liburua kaleratu zuen iurretarrak. Gai honi buruz 2001ean kaleratu zuen bere lehenengo liburua. Harrezkero, ikerketa ildo berriei jarraitu zien. Informazio gaurkotuagaz liburua kaleratu zuen orain bost urte.
Irazabalen beste ezaugarrietako bat iurretar peto petoa izatea zen. Bere herriaz harro zegoen eta baita iurretar izateaz ere. Dantzenganako zaletasun berezia zuen eta aditua zen. Arlo horretan ere errekonozimenduak jaso zituen. 2019an Bizkaiko dantzarien Biltzarrak kulturgile iurretarra saritu zuen Durangaldeko folklore eta dantza tradizionalean egindako ikertze eta hedatze lanagatik. "Zortekoa izan naiz, kultura ofizio izan dudalako. Meritua, baina ez da nirea bakarrik. Lantegian zortzi orduz lanean egon eta gero dantzari heltzeko gogoz egon diren guztiena ere bada", azaldu zuen iurretarrak saria jasotzerakoan. Historialari moduan eginiko azken lana Markel Onaindia kazetariagaz kaleratu zuen, Iurretako kofradiak. Iraganari etorkizuna ematen liburua.
Irazabal ANBOTOn
Irazabalek ANBOTOrenganako gertutasuna eta babesa sarritan agertu zuen. Zutabegile jardun zuen urte askoan. Albiste eta gai ugari lantzerakoan aditu moduan sarritan kolaboratu zuen. Izan ere, memoria historikoa lantzeaz gainera, memoria pribilegiatua zuen datuez oroitzeko. Datak, gertaerak, izenak, argazkiak... bere artxibo partikularrean gorde eta gogoratzen zituen. Durangaldeak asko zor dio Irabazali, baita hedabide honek ere hainbeste urtean egindako lanarengatik.
https://anboto.org/iurreta/1724315527151-jon-irazabal-historialaria-hil-da
