Gaztedi Dantzari Taldeak 70 urte beteko ditu aurten. Izan ere, 1951. urtetik daramagu Santutxutik (Bilbo) euskal folklorea sustatzen eta beste auzo zein herrialde batzuetara euskal kultura zabaltzen.

 Urteurrena ospatzeko asmoz, hortaz, egitarau berezia prestatu dugu, folkloreari berari zein gure taldearen ibilbideari merezi duten omenaldia egiteko.
 
2020ko urtarrilean hasi ginen urteurrena prestatzen; ekintzaz jositako programazioa antolatu genuen ilusio handiz, betiere, egoeraren araberako aukerak planteatuz. Baina COVID-19ak eragin duen ezohiko egoera dela eta, ezin izango dugu geure buruan eraikitako programazioa aurrera eraman. Ez oraingoz, bederen.

Egoera zein den kontuan hartuta, eta azken momentura arte lanean eta alternatibak bilatzen aritu garen arren, ohartu gara aukerarik zuhur eta zentzudunena urteurreneko ospakizun-jarduerak atzeratzea izango dela. Hortaz, pena handiz, baina itxaropentsu, 2022an ospatuko dugu Gaztediren 70. urteurrena. Ez dugu baztertzen, alabaina, 2021ean gure egiazko urteurrenari keinua egitea eta, hartara, urte bukaerarako ekimen berezia antolatzeko asmoa dugu.

Bizi dugun alarma-egoera dela ta bagenekien aurtengo Dantzari Eguna berezia izango zela. Horregatik dantza talde bakoitzari bere herrian ahal duena dantzatzeko eta bideo bat bidaltzeko eskatu genien.

Badakigu taldeak oso egoera desberdinetan daudela. Talde batzuek entseatzen jarraitzen dute, beste batzuek ez dute udalaren baimenik jaso, beste talde batzuek udaleko lokaletan entseatzen dute baina itxita daude,... Baina federazio honek eta federazioa osatzen duten taldeek ezin dugu gelditu, eta ez dugu gelditu nahi. Uste dugu azaroa une egokia izan daitekeela jarraitzeko, edo jarraitu nahi dugula aldarrikatzeko. Egiten duguna eta mugitzen dugun dantzari kopurua aldarrikatu nahi dugu, eta zerbait egiteak ere, talde bakoitzak ahal duen neurrian, dantza tradizionalak aurrera jarraitzen duela erakusteko balio dezakeela uste dugu.

Hemen ikusi dezakezue bideoak

001 LORA BARRI DT

002 LAGUNTASUNA ELKARTEA 

Bizkaiko Dantzarien Biltzarrak, gainerako erakunde antolatzaileekin hitz egin ondoren, hurrengo maiatzaren 17an Zamudion egitekoa zen Dantzari Eguna atzeratzeko erabakia hartu zuen apirilean.

BDBren asmoa Dantzari Eguna urriaren 18an ospatzen saiatzea zen, baina data hurbil dugunean, egungo egoerak eta Osasun Sailaren azken agindua kontutan harturik, 2021eko maiatzeko hirugarren igandera atzeratu behar izango dugu. Egun horretan bai, Zamudion elkartuko gara denok, hala espero dugu behintzat, gure dantza tradizionalaz gozatzeko elkarrekin eta segurtasunarekin.

Dena den, Zamudiora joan gabe Dantzari Eguna beste era batean ospatzera animatu nahi zaituztegu, laster jasoko duzue horren berri gure proposamen eta datarekin.

Eskerrik asko eta animo danori!